العدد : ١٥٠٦٠ - الاثنين ١٧ يونيو ٢٠١٩ م، الموافق ١٤ شوّال ١٤٤٠هـ

العدد : ١٥٠٦٠ - الاثنين ١٧ يونيو ٢٠١٩ م، الموافق ١٤ شوّال ١٤٤٠هـ

الثقافي

من شعره العامي من ديوان مطر على وجه الحبيبة
من شعره العامي من ديوان مطر على وجه الحبيبة

السبت ٠١ يونيو ٢٠١٩ - 10:24

نص: سلمان الحايكي

مطر على وجه الحبيبة

في الشتا اللي راح

ما شفنا على ترابه مطر

وين كنت لحظة اهبوب الشمال؟؟

وين ضحكات الشجر؟

واليهال اللي أكتبوا اسمج كمر..

فوك الدفاتر..

وعلى وجوه المساطر..

والشنط

لونوا في اثيابج البخنك..

وحبات الزري

حتى كل يوم انطروا

كلبج يغني البنجري

ولسانج المحبوس لا غنى..

ولا صفك معاج..

حتى ما ضكنا البسر والعمبري!!

يالحبيب، ياللي من عينج أخذنا الليل وأفراح السمر

في الشتا اللي راح..

ما شفنا على ترابج مطر..

المطر يالزينة ما عمره انقطع..

عنج ولا عنا انقطع !!

احنا شربنا الماي من عينج بحر..

حنظل على شفاهج يذوب..

سجين تقطر بالوجع

أنت نحرتين العشك..

صار الفجر عندج غروب !!

لو تاب عاشق من طريجج

المطر ما يوم عن دربج يتوب !

في الشتا اللي راح

ما شفنا على ترابج مطر

وين كنت لحظة اهبوب الشمال؟

يالمطر زور الحبيبة يالمطر

سو العجايب يالمطر

طارت من غيابك عصافير الطريج

خل الفرح يرجع مثل أول ويزيد

خلنا نتلاكى ف زرانيك الفريج

نمسح اللي ف عينه كل همات وضيج

واللي انخزن في كليبه كل يابس عتيج

خلنا كل لحظه نشخبط بالأمل

اسمك

اسمها

بالندى.. بالماي.. بالمشموم..

بأفراح العصافير الجديدة

نرسم اعيونك مطر حامي شديد

طاح المطر

زيده

زيده في عيون الحبيبة

زيده..

خل الدنيا مثل الشيرة في كليب القصيدة

كلمات دالة

هل ترغب بالتعليق على الموضوع؟

لا تتردد في إعطاء تعليقك ومشاركة رأيك

الاسم:
النص:
تبقى لديك (600حرف

aak_news